Իրենց իշխանության գալը հենց նախկինների վերադարձ է. Մենք դա թույլ չենք տալու. Վահե Ղալումյանը Մարուքյանի մասին

Տեղի ունեցածը կարող եմ բնութագրել որպես պարոն Մարուքյանի կողմից սադրանք: Այս մասին NEWS.am-ի հետ զրույցում նշեց «Իմ քայլը» խմբակցության պատգամավոր Վահե Ղալումյանը՝ հավելելով, որ սա երկարատեւ կազմակերպված էր:

Հիշեցնենք, որ ԱԺ նիստերի դահլիճում նախօրեին տեղի ունեցած ծեծկռտուքի ժամանակ «Լուսավոր Հայաստան» խմբակցության ղեկավար Էդմոն Մարուքյանի հետեւից հարվածողը հենց Վահե Ղալումյանն էր:

«Երբ պարոն Մարուքյանը ԱԺ լիագումար նիստերից մեկի ժամանակ «անբարոյականի վաստակ» արտահայտությունն արել է, ես հասկացել եմ, որ ինքը քաղաքականության մեջ ուրիշ օրակարգ ունի, որի մասին ինքը երեկ երեկոյան բացեիբաց հայտնեց: Նա նշեց, որ մենք ՀՀ հաջորդ իշխանությունն ենք լինելու»,-ասաց նա:

Հարցին, թե իրենք շանս ունե՞ն լինելու հաջորդ իշխանությունը, Ղալումյանը պատասխանեց. «Մեր քաղաքական թիմը հայտարարել է, որ մենք թույլ չենք տալու նախկինների վերադարձը: Ես պարոն Մարուքյանին այդ տեսանկյունից եմ նայում: Իրենց իշխանության գալը ոչ այլ ինչ է, քան նախկինների վերադարձը»:

Վահե Ղալումյանը չցանկացավ մեկնաբանել իր կուսակից Սասուն Միքայելյանի արարքը, որը խոսքին պատասխանեց բռունցքներով. «Սասուն Միքայելյանի արարքը ես չէ, որ պետք է մեկնաբանեմ:

Ինքը մեկնաբանել է, համոզված եմ, որ ինքն էլ չէր ուզում, որ այդպես ստացվի, բայց նշեմ, որ Մարուքյանի եւ Միքայելյանի հայհոյանքները փոխադարձ են եղել: Պարոն Մարուքյանը ամբիոնից իջնելու իրավունք չուներ: Սասուն Միքայելյանն էլ իրավունք չուներ տեղից վեր կենալու եւ ամբիոնին մոտենալու: Դա իմ սուբյեկտիվ կարծիքն է»:

Հարցին, թե չի՞ կարծում, որ Սասուն Միքայելյանն առնվազն պետք է ներողություն խնդրի, «Իմ քայլի» պատգամավորը պատասխանեց. «Չեմ ուզում ոչ իր ասածները, ոչ արարքները մեկնաբանել:

Բայց ինքն էլ իր արարքների մեկնաբանությունը ներքուստ ունի: Ես ԱԺ դահլիճում մոտ եմ նստում «Լուսավոր Հայաստանի» պատգամավորներին եւ պարոն Մարուքյանի այդ սադրիչ խոսելաոճը նորություն չի: Դա պարբերաբար եղել է»:

Ինչ վերաբերում է նրան, որ ինքը՝ Վահե Ղալ;ումյանը հետեւից հարվածել է Մարուքյանին, նա նշեց. «Միջադեպն ինձն համար այնքան տհաճ է, որ ես ձայնագրությունները չեմ էլ նայել: Նույնիսկ ինձ վերաբերող հատվածը: Ես ինքս զղջում եմ, որ նման միջադեպ է եղել, եւ ես այդ միջադեպին մասնակցել եմ: Ներողություն եմ խնդրում ՀՀ քաղաքացիների առաջ: Ես կշռադատված մարդ եմ ինձ համարում, բայց հայտնվել եմ նման միջադեպի մեջ:

Ես փորձել եմ կանխել, որ դա չլինի, բայց պարոն Մարուքյանը նշում է, որ ես խփել եմ: Եթե չեմ սխալվում՝ ինձ էլ են խփել, բայց ես դրա վրա չեմ ծանրանում: Ես հիշում եմ, որ տեսել եմ Մարուքյանի խփելը Սասուն Միքայելյանին ու վազել եմ, փորձել եմ կանխել: Էնտեղ քաշքշոց էր»:

Դիտարկմանը, որ եթե բռնությունն անպատիժ մնա, արդյոք դա ազդակ չի լինի, որ հետագայում եւս նման միջադեպերի ականատես լինենք, Վահե Ղալումյանն ասաց. «Մենք իշխանության ենք եկել ոչ բռնի, թավշյա հեղափոխությամբ եւ դա մեր գերակա արժեքներից է: Մենք պետք է փորձենք խմբակցության սերսում նաեւ մյուս երկու խմբակցությունների հետ պայմանավորվածության գանք, որ նման բաների չենք գնալու:

Իհարկե, դրան տանում է սադրանքը եւ սադրող ուժերն էլ պետք է իրենց սադրանքի մասին մտածեն: Իրենց կին պատգամավորի ելույթը, ապա նաեւ պարոն Մարուքյանի ելութը ոչ այլ ինչ էր, եթե ոչ ուղիղ սադրանք»:

Ինչ վերաբերում է քաղաքական գնահատական տալուն, որի պահանջով հանդես է եկել Էդմոն Մարուքյանը, նա նշեց. «Երբ որ պարոն Մարուքյանն իր արածի քաղաքական գնահատականը կտա, ես ինքս կնախաձեռնեմ մեր խմբակցությունում դրա քննարկումը:

Երբ Ալեն Սիմոնյանին «անբարոյականի վաստակ» էր ասում, երբ իր խմբակցության կին պատգամավորը ասում էր, որ Հրայր Թովմասյանը Ալեն Սիմոնյանին հետեւից գրկել է… գեներալ Մանվելի հետեւին ձեռք տալու լեքսիկոնն է եկել Ազգային ժողով:

Ամեն դեպքում՝ մենք բռնությունից պետք է զերծ մնանք: Ինձ թվում է սա ազդակ էր, որ մենք սրա մասին խոսենք, պայմանավորվածություն ունենանք: Բայց պակաս կարեւոր չէ նաեւ ընդդիմադիր այդ փոքրիկ խմբակցության դիրքորոշումը, եւ իրենց բերած լեքսիկոնը ԱԺ»:

Վահե Ղալումյանն ուղիղ սադրանք է համարում այն, որ Մարուքյանը Սասուն Միքայելյանին անվանել է Շմայս. «Դա ուղիղ շանտաժի դրվագ էր, հենց էդտեղից սկսվեց: Մարուքյանը կարող է Ալեն Սիմոնյանին ասել՝ անբարոյականի վաստակ, Սասուն Միքայելյանին ասել՝ Շմայս»:

Ավելի վաղ NEWS.am-ը հայտնել էր, որ մայիսի8-ին ԼՀԿ խմբակցության ղեկավար Էդմոն Մարուքյանի ելույթի ժամանակ իրավիճակը թեժացավ եւ ԱԺ դահլիճում իսկական ծեծկռտուք սկսվեց: Տեղից «Իմ քայլի» պատգամավոր Սասուն Միքայելյանը սպառնաց, որ «կցխի», որից հետո Մարուքյանն իջավ ամբիոնից, մոտեցավ Միքայելյանին, վերջինս էլ հարձակվեց Մարոեւքյանի վրա՝ հարվածներ հասցնելով:

Այդ խառնաշփոթի մեջ, երբ շատերը փորձում էին բաժանել, Մարուքյանին հարվածեցին նաեւ «Իմ քայլը» խմբակցության պատգամավորներ Արտակ Մանուկյանը եւ Վահե Ղալումյանը:

«Լուսավոր Հայաստանը» հայտարարեց, որ լքում է ԱԺ նիստերի դահլիճը եւ սպասում է քաղաքական հետեւանքների:

(Visited 121 times, 1 visits today)

sirartsir

Добавить комментарий

Ваш адрес email не будет опубликован. Обязательные поля помечены *

Наверх